Cilat janë dy kalatë e zhdukura në regjionin e Gjilanit

Kalatë paraqesin vlera të rralla të trashëgimisë kulturore. Regjioni i Gjilanit i ka disa kala. Kalaja e Pogragjës është një nga vlerat më të rëndësishme të kësaj trashëgimie në këtë trevë, që daton nga shekulli XIV, shkruan gazeta online Mediafokus.info

Dëshmitë e mëvonshme flasin për një kala të rindërtuar që në shekullin VI. Pogragja, në antikë, ishte një nga stacionet e rrugës që lidhte këtë pjesë të Kosovës me rrugën Nish-Shkup.

Elemente të zhvillimit të shoqërisë njerëzore në kodrën e Kalasë, hasen që nga periudha e bronzit, ajo antike dhe bizantine.

Një nga karakteristikat që e dallon këtë kështjellë, është planimetria e saj, e cila ka formën e një pesëkëndëshi të çrregullt, ndërsa muri jugor i kullës qendrore formon njëkohësisht murin mbrojtës të kështjellës.

Të njohura janë edhe Kalaja e Mireshit, Kalaja e Resulës, Kalaja e Zhegrës, Kalaja e Bresalcit, që njihet si Kalaja e Princeshës, e Sllakocit të Epërm, e Gadishit, e Kukajve etj.

Të zhdukura konsiderohen kalaja e Përlepnicës dhe ajo e Prizrencit.

Për kalatë ka edhe legjenda. Sipas një legjende, ndërtimi i Kalasë së Pogragjës ka zgjatur disa vjet. Njëri prej muratorëve e kishte lënë nusen e re, sapo ishte martuar. Atij i kishte lindur një djalë, që ishte rritur e bërë burrë pa e parë asnjëherë babanë e tij.

Një ditë ishte nisur ta takonte të atin. Sipas gojëdhënës, takimi mes tyre përfundon në mënyrën tragjike, pasi që babait, nga habia kur e sheh djalin, i bie çekani nga dora dhe e godet atë në kokë, duke e lënë të vdekur në vend. /Mediafokus.info