Murati (LVV): Ja sa para ndau Kosova për shpenzimet në Gjykatën Speciale
Deputeti i Lëvizjes Vetëvendosje, Hekuran Murati, ka thënë se nga buxheti i Kosovës, 16.5 milionë euro janë ndarë për shpenzimet në Gjykatën Speciale.
Ai ka thënë se për muajt e mbetur të vitit janë ndarë nga katër milionë euro për mbulimin e këtyre shpenzimeve, pavarësisht se ende nuk ka ndonjë aktakuzë të konfirmuar.
Murati në Interaktiv të KTV-së ka thënë se kanë mbetur 8 milionë e gjysmë në buxhet, por sipas tij edhe ato janë shpërndarë në projekte tjera, për çka thotë se Pako të Rimëkëmbjes nuk do të ketë.
“Po flasim për pesë muajt e mbetur të vitit. Deri tash nuk kemi asnjë aktakuzë të konfirmuar, 20 milionë për muajt e mbetur të vitit, që përkthehet në 4 milionë në një muaj. Pra, amendament kanë bërë për mbrojtën në Gjykatën Speciale. Hiqi 16.5, neve po na mbesin 8 milionë e gjysmë për Pakon e Rimëkëmbjes. Edhe kjo shifër ka shkuar në projekte tjera. Pako të Rimëkëmbjes nuk ka në këtë buxhet”, ka thënë ai.
Murati ka thënë se në buxhet nuk janë futur as shtesat prej 170 euro.
“Edhe shtesat prej 170 euro që vazhdimisht kanë bërë zhurmë, kanë mund me u bërë nga fillimi, por as tash nuk i kanë futur në buxhet. Unë do të kërkoj në seancë që me i buxhetuar 80 milionë euro për masën numër 3 të Qeverisë Kurti, sepse këta nuk e kanë buxhetuar, edhe pse janë thirrur”, ka thënë ai.