Qytetarët që votojnë me postë s’po mund ta shkarkojnë fletëvotimin

Edhe pse ka nisur të rrjedhë afati ligjor, Komisioni Qendror i Zgjedhjeve (KQZ) nuk ka publikuar fletëvotimin për qytetarët që do të votojnë me postë.

Madje në faqen e KQZ-së mungon edhe broshura e kandidatëve. Shumë qytetarë kanë shkruar përmes rrjeteve sociale se nuk po u mundësohet votimi.

Ndaj vonesave ka shprehur kritika edhe kandidatja për deputete nga radhët e Lëvizjes Vetëvendosje, Donika Gërvalla. Ajo ka thënë se e drejta e votës është e drejtë kushtetuese dhe jo lëmoshë e kryetares së KQZ-së, Valdete Daka.

Përmes një postimi në Facebook ajo ka thënë se edhe pse votimi me postë ka filluar në mesnatë, ende nuk janë publikuar listat e votuesve e as fletëvotimet.

“Sot në mesnatë ka filluar afati për votimin me postë, pra votimin e mërgatës. 10 orë më vonë nuk janë publikuar ende as listat e votuesve dhe as fletëvotimet. Koha është edhe ashtu tepër e shkurtër dhe çdo vonesë e pafalshme”, ka thënë ajo.

“Kjo nuk është thjesht një shkelje administrative. Ky është një akt skandaloz i varësisë totale politike nga kapësit e shtetit. Ja pse secili dhe secila duhet të dalë më 14 shkurt dhe të japë votën e tij. Ndryshimi po vjen pashmangshëm dhe po vjen fuqishëm. Nuk ka kush që e ndal, as KQZ-ja”, shkruan ajo.