Zvicra me masa të reja antiCOVID-19, në fuqi nga 8 shkurti

Kushdo që hyn në Zvicër, i ardhur nga një zonë ose shtet rreziku, nga 8 shkurti duhet të tregojë një test negativ PCR, shkruan 20minuten.ch.

Pas kësaj, nevojitet mbyllja në karantinën dhjetë-ditore. Por, ajo mund të përfundojë pas shtatë ditësh nëse e bën testin negativ PCR ose “antigjen” me shpenzimet tuaja.

Por, çfarë do të thotë kjo për udhëtarët në transportin ajror?

Regjimi në këtë transport është më i rreptë: të gjithë udhëtarët, në momentin kur hipin në aeroplan duhet të tregojnë një test negativ PCR. Kompania ajrore përkatëse është përgjegjëse për kontrollin.

Nëse nuk keni rezultat testi, ekuipazhi i fluturimit duhet t`ua refuzojë hyrjen në atë aeroplan.

Çfarë thotë kompania ajrore e Zvicrës, “Swiss”, për rregullat e reja?

“Rregulloret e reja do të kenë një ndikim të madh në trafikun ajror zviceran”, thotë një zëdhënës i kompanisë, përcjell albinfo.ch. Por, deri në çfarë mase do të jetë ky ndikim, nuk mund të thuhet ende.

“Swiss” aktualisht po punon për t’u ofruar pasagjerëve një pasqyrë të qendrave të testimit në vendet, shtetet përkatëse. Po kështu, Swiss aktualisht po analizon saktësisht se si do të kryhen kontrollet në avion.

Megjithatë, këtu ka edhe një lajm të mirë: nëse nuk mund të tregoni, gjegjësisht nuk keni rezultat testi negativ, fluturimi ose bileta e juaj nuk do të “digjet”, transmeton albinfo.ch.

Pasagjerët, sipas “Swiss”, kanë mundësinë ta shtyjnë fluturimin për një termin tjetër, pa paguar dyfish.

Po si qëndron puna me ata që hynë në Zvicër në rrugën tokësore pa pasur një test negativ me vete?

Nëse hyni në Zvicër me makinë ose autobus, pa test, duhet të bëni vetë testimin dhe karantinën menjëherë pas hyrjes, me shpenzimet tuaja.

Autoritetet kryejnë “kontrolle të bazuara në rrezikun e vlerësuar” në kufij, që domethënë nuk arrijnë të kontrollojnë të gjithë, përcjell albinfo.ch.

Megjithatë, autoritetet raportojnë në kantone këdo që kapin. Ekziston rreziku i gjobitjes prej 200 frangash.