63-vjeçari asgjëson familjen, dy fëmijë, bashkëshorten dhe motrën

Një ngjarje tronditëse ka ndodhur në Gjermani, ku një 63-vjeçar dyshohet se u ka marrë jetën katër anëtarëve të familjes së tij, në tre lokacione të ndryshme, përpara se të kryente vetëvrasje, transmetojne mediat shqiptare.

Lajmi u konfirmua përmes një deklarate të përbashkët nga Zyra e Prokurorit Publik të Tübingen dhe Policia e Reutlingen.

Sipas autoriteteve, fillimisht ai ka qëlluar për vdekje motrën e tij 60-vjeçare. Më pas shkoi në biznesin familjar ku vrau dy djemtë, 27 dhe 29 vjeç.

Viktima e fundit ka qenë gruaja e tij 57-vjeçare, e cila dyshohet se nuk ishte nëna biologjike e djemve.

Pas këtij akti makabër, autori ka drejtuar armën kundër vetes.

Mjeti i krimit është gjetur pranë trupave të tij dhe bashkëshortes.

Mediat lokale raportojnë se 63-vjeçari ishte gjuetar, por ende nuk dihet nëse e posedonte armën me leje.

Policia ka përjashtuar dyshimet për persona të tjerë të përfshirë, ndërsa hetimet vazhdojnë.

“Ende nuk është e qartë se kur saktësisht janë kryer vrasjet. Jemi në fazat e para të hetimit”, tha policia për agjencinë gjermane të lajmeve Bild.