“Osmani e përfshirë për lirimin e Pantiq”, presidentja ndërmerr hapa ligjorë kundër Ridvan Berishës

“Osmani e përfshirë për lirimin e Pantiq”, presidentja nesër ndërmerr hapa ligjorë ndaj Berishës.

Gazetari Ridvan Berisha në Politiko tha se presidentja Vjosa Osmani dhe kabineti i saj janë të përfshirë në lirimin e ish-policit Dejan Pantiq.

Këtë e kanë demantuar nga Presidenca e Republikës së Kosovës. Madje, në reagim thuhet se Osmani qysh nesër do të ndërmarrë të gjithë hapat ligjorë për këtë shpifje të Ridvan Berishës.

“Deklarata e sotme e Ridvan Berishës gjatë emisionit “Politiko” në Kanal 10, kinse Presidentja Osmani është implikuar në rastin “Pantiq”, është gënjeshtër, sajim dhe shpifje e paprecedentë. Presidentja Osmani në asnjë rast dhe në asnjë situatë nuk interferon në punën e organeve të drejtësisë. Këtë NUK e ka bërë as në rastin “Pantiq”. Ky model i takon të kaluarës. Presidentja punon me përkushtim për ta afirmuar Kosovën dhe për ta forcuar sundimin e ligjit dhe rendit. Liria e fjalës është në funksion të të vërtetës, por jo të shpifjeve. Presidentja Osmani qysh nesër do të ndërmarrë të gjithë hapat ligjor për këtë shpifje të Ridvan Berishës”, thuhet në reagim.