Nuk po e ndotni ambientin, po e poshtëroni veten – Natyrën nuk e kemi trashëgimi nga prindërit, e kemi borxh ndaj fëmijëve

Shyqeri Mehmeti, një qytetar nga Gjilani, adhurues i natyrës, është shprehur i tmerruar me gjendjen e ambientit.

Lumenjtë plot mbeturina nuk janë problem natyre, por problem karakteri. Kush hedh mbeturina në lumë, pyll apo rrugë, po tregon mungesë kulture, përgjegjësie dhe respekti për komunitetin ku jeton, ka reaguar Mehmeti.

Kjo nuk është “pakujdesi e vogël”. Është dëm real: ujë i ndotur, sëmundje, shkatërrim i jetës dhe kosto që i paguajmë të gjithë.

Askush nuk ka të drejtë ta përdorë natyrën si kosh plehrash. Nëse s’je i zoti ta ruash, s’je i zoti as ta shfrytëzosh.

Ndotja nuk është zgjedhje personale, është shkelje ndaj të tjerëve.

Çdo qese në lumë është turp publik.

Natyrën nuk e kemi trashëgimi nga prindërit – e kemi borxh ndaj fëmijëve, thotë Mehmeti.

Këto pamje flasin vetë. Kjo nuk është “pakujdesi” – kjo është sjellje primitive që dëmton ujin, tokën dhe shëndetin e secilit prej nesh.

Këto mbeturina nuk zhduken. Plastika që shihet këtu do të mbetet me dekada, ndërsa një lumë i bllokuar si ky krijon vërshime, erë, baktere dhe dëmton gjithë ekosistemin përreth.

Kur njerëzit hedhin shishe, qese e mbeturina në lumë, ata realisht po i hedhin te shtëpia e vet – vetëm se pasojat u kthehen më vonë.

Ky është mentalitet i një shoqërie që s’ka disiplinë dhe s’ka turp për dëmin që shkakton.

Ky vend duhej pastruar urgjentisht dhe pastaj komunës duhet t’i kërkohet vendosje kamerash ose inspektime të rregullta.

Njerëzit që e bëjnë këtë s’do të ndryshojnë me lutje – ndryshojnë vetëm kur gjobiten dhe turpërohen publikisht për veprimin që bëjnë.

Kjo që shihet këtu është pasqyrë e edukimit tonë si shoqëri.

Nëse e pranojmë këtë si “normale”, atëherë s’na ka faj askush tjetër për mjedisin që kemi.