Rikujtim: Ismet Maliqi, njeriu që e karakterizonte dija dhe thjeshtësia

Para 14 vitesh u nda nga jeta ekonomisti Ismet Maliqi, ish-drejtor komunal i Buxhetit, njëherësh, anëtar i kryesisë së PDK-së në Gjilan.

Ismeti shquhej për punë, përkushtim e profesionalizëm dhe si njeri që mbronte me këmbëngulësi parimet e veta jetësore, shkruan Mediafokus.info

Atë e karakterizonte dija dhe thjeshtësia, serioziteti dhe guximi intelektual për t`u ballafaquar me të vërtetën, çfarëdo qoftë ajo.

Ismeti nuk xhelozonte njeri për sukseset e tij. Vetëm në padrejtësi ishte i ndjeshëm. I donte të gjithë, por edhe i qortonte shumë kur ishte nevoja.

Ai dha kontribut të sinqertë në konsolidimin e jetës politike e institucionale në komunë, derisa ishte në cilësinë e drejtorit për buxhet e financa, në një mandat qeverisës.

Ishte i veçantë në mënyrën se si i përjetonte zhvillimet dhe se si punonte për to. Gjithnjë dhe në cilëndo rrethanë, të vërtetën e thoshte troç, pa tentuar në asnjë moment të lëvizte nga parimet e tij jetësore.

Ishte i pa kompromis kur flitej për të vërtetën dhe përgjegjësinë.

Ismeti ka lënë prapa një trashëgimi morale, kulturore, atdhetare e politike, si vlerë e patjetërsueshme për familjen.

Ismet Maliqi ishte i lindur më 20 nëntor 1959, në fshatin Miresh dhe në të njëjtin muaj edhe u largua nga kjo botë. /Mediafokus.info