Abazi: Përmes Gërvallës kryeministri po synon ta shkatërrojë Presidenten
Ngacmimet dhe ironizimet publike të Ministres së Punëve të Jashtme (MPJ), Donika Gërvalla, ndaj presidentes së shtetit, Vjosa Osmani, po konsiderohen si sulme të orkestruara të kryeministrit Kurti ndaj kësaj të fundit.
Ish-deputeti i Lëvizjes Vetëvendosje në Kuvendin e Kosovës, Haki Abazi, thotë për “Front Online” se kryeministri Kurti, përmes ministres Gërvalla, siç thotë ai, po tenton ta shkatërrojë presidenten e vendit.
Ai për këto veprime e ka kritikuar kryeministrin, duke thënë se është një komunist.
Sipas Abazit, kreu i VV-së po vepron njëjtë me Osmanin ashtu siç ka vepruar dikur me të.
“Nuk ka të bëjë fare me Gërvallën e Osmanin, por me strategjinë e Kurtit për ta shkatërruar Vjosa Osmanin. Kurti është një komunist i cili do me shkatërrua opozitën e sidomos të djathtën në Kosovë, strategji e njëjtë siç ka ndodh në Shqipëri dhe po shihet rezultati i qasjes së tij ndaj Osmanit njëjtë sikur me mua kur i kemi fituar zgjedhjet e para kundër Osmanit, është fenomen i vazhdueshëm”, tha Abazi.
Ish-deputeti i VV-së ka pretenduar se Kurti, duke përdorur Gërvallën, dëshiron ta shkatërrojë Listën Guxo.
Abazi thotë se do të dështojë kryeministri, pasi, sipas tij, qytetarët e kanë kuptuar ‘djallëzinë’ e tij.
“Kurti po e përdor një njëri të dobët si Gërvallën pa kurriz e pa asnjë përvojë politike për ta shkatërruar Listën Guxo dhe tani iu ka drejtuar koalicionit të një pjese të PDK-së, pjesën e LPK-së, ku po dëshiron me bërë parapërgatitje për koalicion, ku mendoj që kjo do të dështojë, se çdo ditë po e kuptojnë qytetarët djallëzinë e tij”, theksoi Abazi.
