Arrestohet reperi Mossi dhe dy të tjerë, e sulmoi gazetarin Burim Pacolli
Gramos Krasniqi, i njohur me nofkën ‘’Mossi’’, është arrestuar për sulm ndaj gazetarit Burim Pacolli.
Lajmin e ka konfirmuar për Gazetën Express, zëdhënësja e Prokurorisë Themelore në Prishtinë, Kaltrina Shala.
Kjo e fundit, ka bërë të ditur se përveç Mossit, janë arrestuar edhe dy persona të tjerë.
Siç bëhet e ditur nga Prokuroria, ata po hetohen për ‘’Lëndim të lehtë trupor’’, ‘’Kanosje’’ dhe ‘’Posedim të paautorizuar të narkotikëve, substancave psikotrope ose analoge’’.
“Lidhur me pyetjen tuaj, ju njoftojmë se Prokurori i Shtetit në bashkëpunim të ngushtë me Policinë e Kosovës në kuadër të hetimeve intensive ka ndaluar tre (3) persona një ndër prej tyre është ndaluar edhe reperi Mossi për veprat penale ”Lëndim i lehtë trupor” sipas nenit 185 të KPRK-së, ”Posedimi i paautorizuar i narkotikëve, substancave psikotrope ose analoge” sipas nenit 269 të KPRK-së, si dhe ”Kanosje” në bazë të nenit 181 të Kodit Penal të Republikës së Kosovës. Në këtë drejtim, Prokurori i Shtetit është duke i ndërmarrë të gjitha veprimet e nevojshme hetimore konform dispozitave ligjore në fuqi.”, thuhet në përgjigjen e prokurorisë.
