Dedikim për babanë: Kam qenë pranë teje çdo ditë, duke parë se si kanceri të konsumoi pak nga pak

Azaleja Gashi e ka rikujtuar me fjalë të ndjeshme babanë e saj, rapsodin Agim Gashi, në përvjetorin e vdekjes.

“Kam qenë pranë teje çdo ditë, duke parë se si kanceri të konsumoi pak nga pak.

Ishte një rrugë e gjatë dhe e vështirë, por unë nuk të lashë kurrë vetëm.

Ti ishe jo vetëm babai im, por edhe këngëtari ynë, krenaria e familjes.

Çdo ditë lexoj poezitë dhe tekstet e tua, mesazhet që ke shkëmbyer me të tjerët.

Sa herë që i lexoj, nuk mund të mos buzëqesh, duke kujtuar sa i mrekullueshëm ishe – i mençur, i ndjeshëm dhe empatik.

Ti ishe babai më i mirë që dikush mund të kishte.

A e di sa krenare jam kur u tregoj të tjerëve se jam vajza e Agim Gashit?

Me sa krenari ua tregoj këngët e tua.

Baba, askush nuk mund të krahasohet me ty.

Kam trashëguar dashurinë tënde për vendin tonë dhe dëgjoj me kënaqësi këngët e tua, ato tradicionale shqiptare.

Sa keq që nuk munda të rritem me ty, sa do të dëshiroja të këndonim bashkë këngë shqiptare, të të kisha pranë në çdo moment të rëndësishëm.

Sa do të dëshiroja të bisedoja me ty, me mendjen që kam sot, me pyetjet që tani mund t’i bëj.

Isha ende fëmijë kur ti ishe këtu dhe nuk dija çfarë të të pyesja.

Të dua shumë, Baba. Je krenaria ime më e madhe dhe do të mbetesh gjithmonë në zemrën time”, ka shkruar Azaleja.