Gjilanasja Era Januzi përzgjidhet anëtare e ekipit kosovar në IMO 2024

Anëtarja e ekipit të matematikanëve të rinj të Gjilanit, Era Januzi, nxënëse e klasës XII në Gjimnazin Natyror “Xhavit Ahmeti” në Gjilan, ka arritë te kualifikohet si anëtare e ekipit 6-anëtarësh shtetëror të Kosovës, që do të marrë pjesë në Olimpiadën Ndërkombëtare të Matematikës IMO 2024, që do të mbahet në korrik 2024, në Mbretërinë e Bashkuar, ka njoftuar profesori i Matematikës, Festim Shkodra.

Kjo nxënëse, vitin e kaluar fitoi mirënjohje nderi, si anëtare e ekipit 4-anëtarësh të Kosovës, në Olimpiadën Matematike Evropiane për Vajza – EGMO 2023, që u mbajt në prill 2023, në Slloveni.

“Rikujtojmë se EGMO 2025, do të mbahet në Kosovë, më 2025, që është shpallur Vit i Matematikës në Kosovë, nga Qeveria e Kosovës”, ka shkruar profesori Shkodra.