Gjukanoviq: Zgjedhjet vendosin nëse do jemi provincë e Serbisë së Madhe apo do ecim përpara

Presidenti i Malit të Zi, i cili po garon për një mandat të tretë, Milo Gjukanoviq, u ka bërë një thirrje votuesve për rundin e dytë që do të zhvillohet më 2 prill.

Gjatë një takimi elektoral në Sutomore, Gjukanoviq u shpreh se në zgjedhje do të vendoset nëse Mali i Zi do të jetë provincë e Serbisë së Madhe, apo do të vazhdojë të zhvillohet si një shtet evropian, shkruan Vijesti.

“Në zgjedhjet e ardhshme do të vendoset nëse duam të jemi provincë e Serbisë së Madhe apo do të vazhdojmë në rrugën që kemi nisur – të zhvillojmë më tej dhe përmirësojmë vendin tonë si një vend i organizuar evropian. Shteti në çdo kohë ka nevojë për njerëz seriozë në krye, sidomos kur ndodhin shqetësime të tilla gjeopolitike, të cilat vetëm sa i shtohen problemeve të trashëguara historike, duke filluar nga përçarja e shoqërisë malazeze”, tha Gjukanoviq.

Zgjedhjet presidenciale në Mal të Zi nuk nxorën një fitues, pasi asnjëri nga kandidatët nuk siguroi votat e mjaftueshme në raundin e parë.

Në rundin e dytë, që do të zhvillohet më 2 prill, presidenti aktual, Gjukanoviq do të sfidohet nga Jakov Milatoviq.