Gjykata Kushtetuese me njoftim për seancën dëgjimore ku do të shqyrtohet vota e Etem Arifit

Gjykata Kushtetuese e Kosovës përmes një njoftimi ka sqaruar mënyrën e mbajtjes së seancës së nesërme dëgjimore, në të cilën do shqyrtohet vota e ish-deputetit Etem Arifi, përkatësisht Vendimi Nr.  07/V-15 për zgjedhjen e Qeverisë së Kosovës, shkruan Mediafokus.info.

Gjykata ka bërë të ditur se për shkak të pandemisë, seanca dëgjimore publike do të mbahet online dhe se e njëjta do të mund të ndiqet nga të gjithë të interesuarit.

“Gjykata Kushtetuese e Republikës së Kosovës do të mbajë seancë dëgjimore publike, të mërkurën, më 2 dhjetor 2020, duke filluar nga ora 10:00, në të cilën do të shqyrtohet kërkesa KO95/20, që për objekt të shqyrtimit ka: “Vlerësimin e kushtetutshmërisë së Vendimit të Kuvendit të Republikës së Kosovës Nr.  07/V-15, të miratuar më 3 qershor 2020, përkitazi me zgjedhjen e Qeverisë së Kosovës”.

Për shkak të rrethanave të krijuara si rrjedhojë e pandemisë COVID-19, seanca dëgjimore publike do të mbahet nëpërmjet video-konferencës (online), përmes platformës Zoom.

Gjykata ka ndërmarrë të gjitha masat adekuate dhe në përputhje me udhëzimet e institucioneve shëndetësore për mbarëvajtjen e punës së gjyqtarëve gjatë seancës dëgjimore.

Të gjitha mediat dhe palët e tjera të interesuara do të mund ta ndjekin seancën dëgjimore drejtëpërdrejt duke klikuar në linkun: https://gjk-ks.org/live-streaming/.”