Harrojeni këtë numër

AVDUSH CANAJ

Më 12 Qershor u linda
në mes trëndafilave të kuq.

12 këngë i këndova në 12 melodi
për Atdheun pa dritë.

Ata një ditë erdhën,
trishtuan ëndrrën për lirinë
e më përplasën në qelinë
numër 12.

12 herë më hodhën para gjyqit
të hienave,
m`i nxinë 12 pranvera.

S`m`u ndanë 12 ujqër
që ma rropën lëkurën
me 12 thika të ndryshkura.

M`i hoqën prangat
pas një shekulli me 12 darë
në ditën e 12 Korriku.

12 orë bëra nga ferri deri në shtëpi
ku më priste nëna,
tri dallëndyshet e mia të vogla
me 12 diej në duar
që s`e njihnin babanë.

Për to çëndisa 12 tufa vargjesh.

Harrojeni këtë numër!
Harrojeni numrin 12.

(1987)