Haziri: Tensionet në veri u shkaktuan nga veprimet e befasishme të Kurtit

Nënkryetari i Lidhjes Demokratike të Kosovës, Lutfi Haziri, deklaroi se moskoordinimi i kryeministrit Albin Kurti me partnerët ndërkombëtarë dhe tejkalimi i agjendës, i ka shkaktuar tensionet në veri.

Ai shkroi në Facebook të dielën se kjo krizë është e shtata e prodhuar nën mandatin e Kurtit, derisa tha se kryeministri po vazhdon me veprime të befasishme.

“Kjo krizë në Veriun e Kosovës është e shtata e prodhuar në mandatin e z.Kurti. Kriza e fundit e cila eskaloi me protesta e dhunë, që burim e ka Beogradin, shkaktoi reagim të ashpër të partnerëve ndërkombëtarë ndaj Qeverisë, sepse z.Kurti po vazhdon me veprime të befasishme. Moskoordinimi me partnerët ndërkombëtarë dhe tejkalimi i axhendës së dakorduar me partnerët tanë në kuadër të dialogut, ka sjell këtë tensionim të situatës”, ka shkruar nënkryetari i partisë opozitare.