I agjëroi 21 Ramazana vetëm me një qepë

Rrëfimi nga burgu, se si agjëronte Hafiz Sabri Koçi – Myftiu i parë i Shqipërisë paskomuniste, ka rrëfyer se si agjëronte në burg, ku ishte mbyllur nga regjimi komunist shkaku i bindjeve fetare.

“Për sa i takon Ramazanit më ka rënë të agjëroj në të gjitha stinët. E kam pasur shumë të vështirë në fillim, pastaj Zoti më ka qetësuar dhe i kam përballuar të gjitha vështirësitë shumë rehat.

Haja vetëm darkë. Në Ramazan haja iftarin dhe deri në iftarin tjetër nuk paraqitesha më në mensë. Ashtu agjërova 21 Ramazana, me një kokërr qepë në xhep, me një domate apo me një gotë kauçuku në të cilën zëja kos me tamlin që më jepnin kundër helmit.

Ndodhte që buka të mos ishte standard, 800 gramë. Meqë mua më jepej rasti të riparoj diçka dhe në guzhinë, një herë vërejta se tepsitë i lyenin me dhjamë derri, por pa bukë nuk rrohej. U detyrova që me thikë të heq koren e poshtme të bukës, kështu që edhe ato 800 gramë zvogëloheshin edhe më shumë.

Ka ndodhur që gjatë verës të kaloj ditën edhe vetëm me një domate, pa shti në gojë kurrgjë tjetër”.