Ismajli ka një mesazh për transportuesit: Kërkesat i zgjidhim bashkë në tavolinë, jo në rrugë

Arbër Ismajli, nënkryetar i Komunës së Gjilanit, ka kërkuar nga transportuesit që të heqin dorë nga protestat në rrugë dhe bllokimi i qytetit dhe t`i kthehen dialogut në tavolinë, sepse tavolina është vendi ku zgjidhen problemet.

Ky është postimi i Ismajlit:

E nderuara Shoqatë e transportuesve, ne i kuptojmë plotësisht kërkesat e juaja si shumë të arsyeshme, të cilat kryesisht lidhen me nivelin qëndror të qeverisjes së Republikës.

Peronizimi është i pamundur në këto momente, sepse mbetet burim i vetëm për funksionalizimin e stacionit të autobusëve. Subvencionimi juaj dhe mbyllja e stacionit, nuk është formë e mirë e reagimit, e cila nuk i kontribuon interesave të juaja, as të qytetarëve tanë.

Në anën tjetër, ju informojmë se inspektorët tanë, bashkë me Policinë e Republikës, janë vazhdimisht në terren kundër taksive ilegale, në mënyrë që mos t`ju dëmtojnë juve si shoqatë, por edhe taksitë legalë.

Protesta juaj e sotme, me sirena të mëdha nëpër qytet dhe bllokimi i komunikacionit, është formë e pa pranueshme dhe se shqetësimet e reagimet qytetare ndaj kësaj forme janë të mëdha.