Kaq shpenzoi kabineti i Sveçlës në vitin 2021 për dreka, darka e udhëtime

Rreth 40 mijë euro është shuma që kabineti i ministrit të Punëve të Brendshme, Xhelal Sveçla shpenzoi gjatë vitit 2021 për dreka e darka zyrtare, udhëtime e reprezentacion.

Mbi 19 mijë euro i kanë kushtuar taksapaguesve të Kosovës, udhëtimet jashtë vendit gjatë vitit 2021, të zyrtarëve të Ministrisë së Punëve të Brendshme.

Në këtë vlerë përfshihen mbi 5 mijë euro të shpenzuara për bileta të aeroplanit dhe mbi 13 mijë euro për shpenzime të udhëtimit, akomodimit e mëditjet.

Ministri Sveçla dhe shefja e kabinetit të tij, Jeta Tela-Shema ka shpenzuar më së shumti për udhëtime jashtë Kosovës, përcjell Paparaci.

Ministria e Punëve të Brendshme ka sqaruar se për cilat shtete ministri Sveçla ka blerë bileta udhëtimi.

Gjatë kësaj kohe sipas MPB-së, Sveçla ka udhëtuar vetëm për në Kroaci dhe në Austri.

Udhëtimet më të shpeshta duket se kanë qenë për në Vjenë, pasi vetëm në qershor të vitit 2021, janë blerë tri bileta për atje, në vlerë prej 933 euro, raporton RTV Dukagjini.

Kurse në tetor janë paguar 1 mijë e 141 euro, prej tyre 887 euro për dy udhëtime në Austri dhe 264 euro për në Zagrep.

Shpenzime po ashtu janë bërë edhe për dreka e darka zyrtare.

Gjithsej, 19 mijë e 136 euro kanë kushtuar drekat, darkat zyrtare dhe shpenzimet e reprezentacionit, si dhe shpenzimet e ushqimit dhe akomodimit.

Për kategorinë e parë, Sveçla dhe kabineti i tij 5 mijë e 306 euro, kurse për të dytën 13 mijë e 755 euro.

Në total Ministri Xhelal Sveçla dhe kabineti i tij kanë shpenzuar gjithsej 38 mijë e 699 euro në një periudhë kohore prej 9 muajsh.