Kokëfortësia e menaxhmentit lë pa akreditim Fakultetin Juridik në Gjilan, përgjegjësia për dështim bie mbi rektorin
AKA: Refuzim i prerë për Prof. Dr. Dukagjin Lekën si bartës i programit juridik
Sipas vendimit zyrtar të Këshillit Shtetëror të Cilësisë (KShC), programi “Juridik i Përgjithshëm – LLB, 240 ECTS” është refuzuar, për shkak se bartësi i propozuar i programit, Prof. Dr. Dukagjin Leka, nuk i plotëson kriteret ligjore të fushës përkatëse
2025,1213 Vendim KShC UKZ Gjilan
AKA ka konstatuar qartë se:
Doktorata e Prof. Dr. Dukagjin Lekës nuk është në fushën e Drejtësisë;
Ajo është përfunduar në Institutin e Studimeve Evropiane në Universitetin e Tiranës, respektivisht pranë Fakultetit Histori–Filologji, çka nuk konsiderohet barasvlefshme me doktoraturë në shkencat juridike;
Sipas Manualit të Akreditimit, bartësi i programit duhet të ketë PhD pikërisht nga fusha e programit të studimit, kriter që në këtë rast nuk është përmbushur
2025,1213 Vendim KShC UKZ Gjilan
Tre mandate prorektor – por jo kriter juridik
Ironia është e thellë: i njëjti person ka mbajtur tre mandate radhazi si Prorektor, aktualisht në pozitën e Prorektore për Bashkëpunim Ndërkombëtar dhe Projekte, por pozita administrative nuk e zëvendëson kualifikimin akademik, vijon shkrimi i qendra.info
AKA nuk njeh tituj politikë brenda universitetit, por vetëm kritere shkencore.
AKA ofroi zgjidhje – Menaxhmenti refuzoi
Sipas burimeve brenda institucionit, AKA i ka dhënë mundësi të qartë Fakultetit Juridik dhe menaxhmentit të UKZ-së, që:
Prof. Dr. Dukagjin Leka të zëvendësohej si bartës;
Të propozohej një profesor i brendshëm i fushës juridike, me doktoraturë dhe punime shkencore që plotësojnë kriteret e AKA-së.
Por, nën udhëheqjen e menaxhmentit të universitetit, të drejtuar nga Prof. Asoc. Dr. Artan Dermaku, kjo mundësi u refuzua kategorikisht.
Këmbëngulja për të mbajtur të njëjtin bartës – pavarësisht paralajmërimeve zyrtare – solli refuzimin e dytë radhazi të programit juridik për të njëjtën arsye identike
2025,1213 Vendim KShC UKZ Gjilan
Ankesa u refuzua – vendimi u vulos në vitin 2026
Universiteti “Kadri Zeka” dhe Fakulteti Juridik parashtruan ankesë formale në AKA, por edhe ajo u rrëzua në mbledhjen e KShC-së të mbajtur gjatë vitit 2026, duke e bërë vendimin përfundimtar dhe të pakontestueshëm
2025,1213 Vendim KShC UKZ Gjilan
Pasojat: studentët e Gjilanit të dënuar me kolegje private
Si rezultat i këtij keqmenaxhimi:
Fakulteti Juridik nuk u procesua fare për akreditim/riakreditim për dy vite radhazi;
Qindra të rinj nga Gjilani dhe rajoni, përfshirë edhe trevat jashtë kufijve, u detyruan të regjistrohen në kolegje private;
Universiteti publik humbi misionin e tij bazë: qasjen e barabartë në arsim cilësor publik.
Alarm i brendshëm: nuk është programi i vetëm i dështuar
Burime të qendra.info bëjnë të ditur se:
Të paktën edhe tre programe të tjera në UKZ janë në rrezik serioz;
Një tjetër program i rëndësishëm pritet të dështojë së shpejti, për shkak të rekrutimit të stafit pa kriteret minimale të AKA-së;
AKA kërkon që profesorët e programeve bachelor të kenë së paku një punim shkencor në Scopus ose Web of Science, kriter që sipas burimeve nuk po respektohet sistematikisht.
Pyetja që mbetet pezull
Kush mban përgjegjësi për këtë dështim?
Menaxhmenti?
Senati?
Apo një sistem që toleron vendime personale mbi interesin publik?
Një gjë është e qartë: kokëfortësia akademike po e paguajnë studentët. Dhe kjo, në një universitet publik, është më shumë se dështim – është tradhti ndaj misionit universitar, përfundon shkrimi i qendra.info
