Komuna e Gjilanit apel kundër zjarreve, fton prokurorinë për hetim të rasteve

Komuna e Gjilanit i ka ftuar qytetarët për kujdes me zjarret, sepse mundësia e shkaktimit të dëmeve është e madhe.

Kryetari i Komunës, Lutfi Haziri ka apeluar te qytetarët, fermerët dhe kalimtarët e rastit që me kujdes maksimal të sillen ndaj natyrës, pronës publike dhe asaj private dhe të mos shkaktojnë zjarre sepse do të sanksionohen nga institucionet e shtetit.

Haziri ka theksuar se rastet e zjarrvënieve janë të patolerueshme dhe do të inicohen në progurori dhe organe të drejtësisë me të vetmin qëllim për rend dhe rregull në mbrojtje të natyrës, pyjeve dhe pronës, pa dallim.

“Djegia e hamulloreve është e pakuptimtë. Inicuesit e zjarreve do të sanksionohen nga organet e drejtësisë. Tashmë e kemi rastin e Pogragjës që është duke u marrë prokuroria me te, sikur që edhe rasti i Stublinës do të procedohet për hetim në prokurorinë e shtetit dhe nuk tolerojmë shkatërrimin e pyjeve dhe hapësirës publike, sepse kështu shkaktohet rrezik i përgjithshëm dhe rrezik i jetës së qytetarëve. Rojet e pyjeve kanë detyrë ekzekutive që ti ruajnë me çdo mjekt dhe çdo kusht pyjet tona. Përkrahja e Komunës së Gjilanit dhe organeve të rendit është maksimale në kryerjen e detyrës së tyre zyrtare”, ka thënë kryetari Lutfi Haziri.