Kuksi dhe Lugina kundër vendimit të Qeverisë së Kosovës për tri vaksinat
Masat e reja të qeverisë së Kosovës për pandeminë po kundërshtohen nga Lugina dhe Shqipëria. Derisa Lugina kërkoi dje rishikim të vendimit, qytetarët e Kukësit do të zhvillojnë sot një protestë paqësore në pikën kufitare në Morinë.
Kjo protestë është thirrur me qëllim të heqjes së pengesës për lëvizje të lirë të shtetasve shqiptarë, të cilët nuk janë të vaksinuar me të tri dozat e vaksinës kundër COVID-19, siç e parasheh vendimi i Qeverisë së Kosovës, që askush nuk mund të hyjë në Kosovë pa pasur dëshminë e vaksinimi me të tri doza.
“Njoftohen të gjithë banorët e rrethit të Kukësit se më datë 24.01.2022 në orën 10 do të zhvillohet një grevë paqësore pranë doganës së Morinit me kërkesë për heqje të pengesave të lëvizjes së lirë të shtetasve shqiptarë nga ana e Qeverisë së Kosovës. Kërkojmë mbështetjen e të gjithëve pasi nuk është protestë politike por paqësore në shërbim të komunitetit”, ka njoftuar organizatori i kësaj proteste Rakip Matmuja.
