Ky është biznesmeni që e hapi kuletën për nevojtarët para shtetit për ta përballuar pandeminë

Në kohën e izolimit të madh në Kosovë si pasojë e pandemisë COVID-19, një biznesmen i kosovar e hapi kuletën për njerëzit në nevojë, shkruan Mediafokus.info.

Është ky Muhamet Ajrullahu, pronari i gjigantit të ndërtimit, AR Katana, i cili e hapi kuletën para shtetit.

Me vendim të ish-kryeministrit Albin Kurti, vendi ishte mbyllur totalisht dhjetë ditë pas fillimit të pandemisë, më 24 mars dhe nevojat e njerëzve për mbështetje ishin rritur jashtëzakonisht shumë.

E Ajrullahu me kompaninë e tij, brenda 2 javësh të fillimit të pandemisë, në mars, kanë shpërndarë tre kontigjente ndihmash për ata që kishin nevojë dhe vlera financiare e kalonte shumën prej 100 mijë euro.

Pronari i kompanisë AR Katana, Muhamet Ajrullahu, pati deklaruar se humanitetin e kanë traditë familjare.

“Për neve, është obligim moral, fetar dhe kombëtar, që në momente të pandemisë, t’i dalim në mbështetje njerëzve që kanë nevojë për miell e produkte tjera, sikurse edhe institucionet për mjete higjienike e shëndetësore”, ka thënë Ajrullahu, më 28 mars.

Për ta falënderuar për këtë mbështetje rekorde, i shkoi në vizitë kreu i Komunës së Gjilanit, Lutfi Haziri, i cili pati theksuar se AR Katana nuk po lejon që njerëzit ta kenë problemin e sofrës.

“Kontributi i AR Katanës në këto 12 ditë tejkalon do kërkesë dhe pritje tonën sepse është kontigjenti i tretë i ndihmave që kjo kompani e shpërndan për qytetarët e Gjilanit, pa dallim. Fal këtij donacioni, ne kemi arritur ta menaxhojmë situatën me lehtësinë me të madhe sepse solidariteti që po tregohet me familjet që kanë nevojë, nuk po lejon njerëzit ta kenë problemin e sofrës në këto ditë vetë-izolimi e vetë-përmbajtje e as problemin e kujdesit për higjienë dhe për mjete medicinale”, ka deklaruar kryetari i Gjilanit, gjatë vizitës aty më 28 mars 2020. 

Për këtë kontribut, afaristi i njohur Muhamet Ajrullahu është nderuar nga i pari i Gjilanit edhe me çmimin “Agim Ramadani”, në 21-vjetorin e çlirimit të qytetit. 

Solidariteti i kësaj kompanie daton më herët, pasi pronari Muhamet Ajrullahu, disa familje me probleme të banimit i ka bërë me kulm mbi kokë.

Ndryshe, Qeveria e Kosovës e udhëhequr atëbotë nga kryeministri Albin Kurti, pati prezantuar masat e parapara në Pakon Fiskale Emergjente më 14 prill, e cila ishte dizajnuar për të arritur këto qëllime: të ofrojë ndihmë financiare shtesë për shtresat më të varfra të shoqërisë pas pandemisë COVID-19; të ndihmojë bizneset në mbulimin e shpenzimeve operative në mënyrë që të sigurohet një pagë minimale për të gjithë punëtorët gjatë situatës emergjente, si dhe  të sigurohet se bizneset kanë mundësi të vazhdojnë veprimtarinë gjatë dhe pas tejkalimit të situatës emergjente.  /Mediafokus.info/