LDK me ofertë për PDK-në e VV-në për bashkëqeverisje në këtë Komunë
Ilir Ferati sot e ka pranuar edhe zyrtarisht detyrën e kryetarit të Istogut. Megjithatë, LDK nuk e ka siguruar shumicën e nevojshme në asamblenë komunale.
Ferati në një prononcim për Gazetën Insajderi ka bërë të ditur se janë duke zhvilluar bisedime me Partinë Demokratike të Kosovës dhe Lëvizjen Vetëvendosje për të arritur marrëveshje për bashkëqeverisje në këtë komunë.
I pari i Istogut thotë se synimi dhe qëllimi është që të ketë një qeverisje të mirë, e cila do t’i shërbej të gjithë qytetarëve të kësaj komune pa dallim.
“Jem në diskutim me dy parti opozitare, ende nuk kemi arrit marrëveshje. Jemi në diskutime me VV-në dhe PDK-në. Nuk kemi mbërri ndonjë konkluzion të marrëveshjes. Kemi edhe disa ditë afat sipas ligjit për zgjedhjen e kryesuesit. Na duhen edhe tre asamblist me sigurua shumicën”, ka thënë Ferati.
Më tej, ai nuk ka treguar nëse synon të arrij marrëveshje më këto dy parti, apo vetëm me njërën prej tyre.
“Ka pasur pika të plan programeve të partive të tjera me të cilat jemi pajtuar që mund të shërbejnë mirë për qytetarët, kështu interesi ynë si parti është që përfitimi të jetë për qytetarët pa dallim”, ka shtuar për Gazetën Insajderi Ferati.
Komuna e Istogut është drejtuar për disa mandate nga bashkëpartiaku i Feratit, Haki Rugova.
Ilir Ferati e mposhti në balotazh, Bekë Berishën e Aleancës për Ardhmërinë e Kosovës.
