Logopedi Iljasa Fazliu ndodhet ende në spitalin e Gjilanit
Logopedi Iljasa Fazliu ende ndodhet i shtrirë në spital. Atij i është shqiptuar masa e paraburgimit për “trajtim të pandërgjegjshëm mjekësor”. Drejtori i Spitalit të Përgjithshëm të Gjilanit, Arsim Emini tha për Gazetën Express se logopedi pritet të lirohet nesër.
Teksa foli për Gazetën Express, doktori Arsim Emini tha se gjendja shëndetësore e logopedit është stabilizuar.
“Mora informacione prej mjekut te dhomës. Ai është ende këtu, por gjendja është duke u stabilizu dhe i tha se nesër të lirojë. Telashet që i ka pas me tension, tash është mirë, sheqerin e ka pas mbi 20-25, ka fillu mu stabilizu”, tha Emini për Gazetën Express.
Gjykata ka vlerësuar se logopedi Iljasa Fazliu ka përdorë metodë të papërshtatshme për trajtim dhe nuk ka zbatuar rregullat e profesionit të logopedit, “ashtu që gjatë seancës për trajtim të fëmijut të moshës 3 vjeçare, me gjendje të autizmit, ndaj të njëjtës ka përdorur fjalë të ndryshme ofenduese dhe degraduese”.
Gjykata Themelore në Gjilan ia ka caktuar një muaj paraburgim Iljasa Fazliut dhe dy të dyshuarve tjerë, I. Sh. dhe R. V.
Sipas gjykatës, “ekziston dyshimi bazuar se i pandehuri I. F., me datë 26 nëntor 2022, në intervalin kohor prej orës 10.00-11.00 minuta, në ordinancën private, në cilësinë e mjekut Defektolog –Logoped, haptas ka përdorur metodë të pa përshtatshme për trajtim dhe nuk ka zbatuar rregullat e profesionit të logopedit, ashtu që gjatë seancës për trajtim të fëmijut të moshës 3 vjeçare, me gjendje të autizmit, ndaj të njëjtës ka përdorur fjalë të ndryshme ofenduese dhe degraduese, kështu që i pandehuri me veprimet e tij bie ndesh me nenin 94 paragrafi 4 nënparagrafi 4.4 të Ligjit mbi Shëndetësinë, duke mos iu përmbajtur parimeve etike dhe profesionale gjatë ushtrimit të kujdesit shëndetësor, përmes të cilave ka ndikuar në keqësimin e gjendjes shëndetësore të fëmijët”.
Me këto veprime i pandehuri I. F. dyshohet se ka kryer veprën penale trajtim i pandërgjegjshëm mjekësor, vepër e sanksionuara me Kodin Penal të Republikës së Kosovës (KPRK).
Ndërsa, dy të dyshuarit tjerë ndodhen në paraburgim për rrahjen e logopedit.
