Milazimi uron Memlin: Urime babush, Zoti të ndihmoftë!

Profesori, publicisti dhe ish-politikani Milazim Krasniqi, përmes një shkrimi në llogarinë e tij në facebook, ka uruar të birin e tij, Memli Krasniqi, pasi u zgjodh kryetar i PDK’së.

Krasniqi tha se për familjen e tij, kjo arritje e Memlit, është përmbushje e besimit që kanë pasur në të.

Milazim Krasniqi ishte një ndër themeluesit e LDK’së, parti rivale e kësaj që dontë udhëheq Memli Krasniqi, nga sot e tutje.

Shkrimi i plotë i profesorit Krasniqi:

Zgjedhja e Memlit për kryetar të Partisë Demokratike të Kosovës, për mua, Ediben dhe gjithë familjen tonë, është një përmbushje e besimit që gjithnjë kemi pasur dhe e kemi në Memlin, si një djalë i mbarë, i suksesshëm, i dashur, i përkushtuar, me vlera të larta njerëzore.

Memli e ka pasur dhe e ka gjithmonë përkrahjen tonë të plotë, në të gjitha projektet, sepse ne e dimë që ai angazhohet vetëm në punë të mira, të mbara e të dobishme, për familjen e për vendin tonë të dashur.

Prandaj e ka përkrahjen tonë të plotë edhe në detyrën e tij të re dhe më shumë përgjegjësi.

Të udhëheqësh PDK-në, realisht është ta prekësh me dorë historinë e këtij shteti, sepse PDK-ja është pjesë substanciale e lirisë dhe e ndërtimit të shtetit tonë.

Ne besojmë se historia e lavdishme e këtij projekti politik dhe oferta e re për kohën që kemi përpara, do t’i prijë Memlit tonë drejt sukseseve të reja.

Urime, babush! Zoti të ndihmoftë!