“Mos ma vendos gjobën, të lutem, jam në shkollë” – policia surprizon vajzën që kishte parkuar gabim

Një studente shqiptare ka ndarë një përvojë të saj me policinë në Tiranë, shkaku i parkimit të makinës pranë universitetit ku studion.

Vajza tregon se shpesh detyrohet të vijë me makinë, pasi banesa ndodhet shumë larg universitetit. Hapësirat për parkim, shpesh mungojnë.

Ajo kishte lënë në xhamin e makinës një shënim ku shkruante: “Mos ma vendos gjobën, të lutem, jam në shkollë.”

Sipas saj, policët që patrullonin në zonë jo vetëm që nuk vendosën gjobë, por lanë edhe një përgjigje plot humor dhe mirësjellje.

Në copëzën e letrës së tyre shkruhej: “Vetëm mëso në shkollë, dhe herë tjetër mëso të parkosh, mike.”

Studentes i bëri shumë përshtypje ky gjest, të cilin ajo e përshkruan si një moment të rrallë mirëkuptimi nga ana e efektivëve.

“Ka akoma policë të mirë që të kuptojnë dhe sillen me zemër. I përshëndes me shumë respekt policët që menduan për mua!”, shkruan ajo në mesazhin për JOQ.