Më shumë se 93 mijë pacientë janë trajtuar vetëm gjatë vitit 2022 në Klinikën Emergjente të Qendrës Klinike Universitare të Kosovës.

Ndërsa 38 mijë prej tyre kanë qenë nga komuna e Prishtinës, shkruan EkonomiaOnline.

Sipas drejtorit të Klinikës Emergjente të Qendrës Klinike Universitare të Kosovës, Naser Syla, duhen ende mjekë specialistë për të përballuar fluksin e qytetarëve. “Në Qendrën Emergjente i kemi 25 specialistë që 23 prej tyre punojnë me ndërrime. Për momentin mua më duhen edhe 39 specialistë të Mjekësisë Emergjente që me mbërri minimumin e standardëve botërore. Sipas standardeve botërore në 100 mijë banorë duhet me qenë 14.9 specialistë të emergjencës, ndërsa ne në 2 milionë banorë i kemi 2.6 specialistë”, thotë Syla.

Kosova për shkak të ikjes së infermierëve dhe mjekëve specialistë është duke u ballafaquar me një boshllëk të madh në sistemin shëndetësor.