Ndërron jetë afroulqinakja e fundit
Të martën në Ulqin në moshën 89-vjeçare ka ndërruar jetë File Kastrati, një grua e mrekullueshme, punëtore, fisnike, mahnitëse.
Ajo është Afroulqinakja e fundit, gjegjësisht personi me të dy prindër Zezakë (Harapë), shkruan ul-info.com.
Me pikëllim kujtoi të gjithë takimet dhe bisedat tona, fytyrën shend e verë të Files kur me fjalë të zgjedhura fliste për Ulqinakët dhe Ulqinaket e moçme.
Në këtë mënyrë praktikisht u zhduk ky komunitet dikur i rëndësishëm, i cili këtij qyteti mesdhetar ia ka dhënë të gjitha, e më së shumti kosmopolizmin, solidaridetin, bukurinë, hijeshinë dhe sharmin.
Mirëpo, mbeten dëshmitë, fotografitë, librat, vallet, varret dhe tyrbet e Zezakëve të Ulqinit.
Postimi i Ismet Karamanagës:
Ky komunitet ka lënë gjurmë të pashlyera në historikun, në jetën dhe në përgjithësi në trashëgiminë e qytetit.
Ky komunitet i ka dhënë një sharm të veçantë qytetit tonë dhe e ka bërë këtë qytet edhe më të bukur dhe më të mirë, duke na sjellë një kosmopolitizëm të paparë në mesdhe. Këta njerëz plotësisht të lirë, me përkrahje të parezervë të popullatës ulqinake, gjithkund të ftuar e të respektuar, në ndenja, në gazmende dhe në dasma, ishin pjesë e pa ndarë e qytetit tonë.
Njëra nga ato ishte edhe Filja e cila ka qenë një zonjë e mirë, e rallë, gjithmonë e qeshur, modeste, me një të ecur karakteristik dhe e cila pa dyshim ka gëzuar një respekt të merituar dhe të veçantë nga të gjithë qytetarët e Ulqinit.
Më kujtohet figura e saj markante duke kaluar Pazarit shpeshherë me broke të bardhe në duar.
Prandaj, unë flas dhe shkruaj me një pietet të veçantë për këtë zonjë, pasi që pas ndërrimit i jetës së saj pak gjurmë mbesin, të themë më mirë shumë gjurmë zhduken nga ky komunitet i rëndësishëm i cili qytetit tonë shekuj me radh i ka dhënë një imazh dhe një kosmopolitizëm të rallë në këtë pjesë të Evropës.
Zonja File dhe të parët e saj kanë mbetur sinonim i një kohe të cilën nuk guxojmë ta harrojmë. Prandaj është mirë të përmenden, të shënohen dhe të mos harrohen kurrë.
