Një i ri shqiptar humb vetëdijen në linjën ajrore Prishtinë-Vjenë
Në linjën Prishtinë – Vjenë sot ka ndodhur një rast i pazakontë. Një i ri shqiptar, i cili fluturonte me kompaninë “Wizz Air” është alivanosur dhe ishte në rrezik për jetën.
Por, fatmirësisht në aeroplan ka qëlluar mjeku shqiptar nga Struga, Nuhi Arsllani, i cili ka intervenuar menjëherë dhe i ka shpëtuar jetën të riut.
Lajmin e ka bërë të ditur Bahri Troja, zyrtar në institucionet e Austrisë dhe veprimtar i njohur shqiptar në Austri, i cili ka qenë po ashtu prezent gjatë këtij fluturimi, njofton albinfo.at.
“Sot, gjatë fluturimit me aeroplan (Wizz Air) nga Prishtina për në Vjenë, një djalë i ri pësoi një kolaps. Për disa minuta ai humbi vetëdijen dhe pothuajse ishte në rrezik që edhe jetën ta humbë. Për fat të mirë në aeroplan ishte edhe mjeku shqiptar nga Struga, Dr. Nuhi Arslani, i cili reagoi menjëherë dhe shumë shpejt e ktheu në jetë. U emocionova shumë, gati e humbëm një djalë të ri shqiptar, por në të njëjtën kohë pata një ndjenjë gëzimi që ne si komb kemi njerëz të zot dhe kompetentë në të gjitha fushat. Të riut që pësoi kolaps i uroj shërim të shpejtë dhe jetë të gjatë, ndërkaq, Dr. Nuhiut shumë suksese në punë, respektivisht profesionin e tij si mjek dhe profesor”, ka thënë ai.
Dr. Nuhi Arsllani është profesor në Kolegjin e Shkencace Mjekësore “Rezonanca” në Prishtinë, ndërsa jeton dhe vepron në Maribor të Sllovenisë.
