Një rrugë në Gjilan mban emrin e saj, po kush ishte Kushe Mica

Një rrugë në qytetin e Gjilanit mban emrin e shkodranes Kushe Mica, në lagjen Arbëria.

Po kush ishte Kushe Mica, historinë e së cilës pak kush e di në Gjilan.

Kushe Mica ishte themeluesja e shkollës së parë për gratë dhe vajzat shqiptare.

Kusha u lind në Shkodër më 16 qershor 1832 dhe vdiq më 3 mars 1913.

Familja e saj, për arsye konflikti gjakmarrjeje, u zhvendosën në Shkodër nga Dukagjini.

Karrierën e mësueses ajo e filloi në moshën 27 vjeçare.

Kushe Mica ishte një grua e vetë-mësuar, e cila për dhjetë vite studioi me farmacistin venecian Shjor Marko Rebeskin.

Gjatë kësaj kohe ajo perfeksionoi gjuhët frënge dhe italiane.

Në 1859 ajo hapi shkollën e parë për gra në Shkodër, të quajtur Shkolla e Kushe Micës.

Shkolla u hap pavarësisht shumë pengesave të vendosura nga autoritetet turke; ceremonia e hapjes ishte e thjeshtë, por me një pjesëmarrje të mirë.

Shkolla mësonte shkrim, lexim, numra (aritmetike), vizatim, këngë (muzikë) dhe punë dore. Shkolla u mbyll në 1904, pas 45 viteve nga themelimi i saj.

Shkolla e Kushe Micës nuk arriti të behej e njohur si shkolla e parë shqipe për arsyen se programi arsimor nuk ishte i dokumentuar dhe Mica nuk ishte në nivelin e duhur arsimor./MediaFokus/