Pensionohet mësuesi dhe kumbara i shoqërive kulturore, Shaban Shabani

Mësuesi Shaban Shabani e ka përmbyllur karrierën profesionale pasi ka arritur moshën 65-vjeçare, shkruan Mediafokus.info

Në Gjilan ai mbahet mend jo vetëm si një mësues i përkushtuar, por edhe si një veprimtar i pashoq kulturor.

Shabani ka themeluar disa ansamble, shoqëri e grupe muzikore në Gjilan, ndër to edhe SHKA “Gurra”.

Konsiderohet kumbarë i shumicës së shoqërive artistike në rajonin e Gjilanit.

Ish-drejtori i Arsimit, Nazim Gagica, veprimtar kulturor e politik, ka bërë një dedikim për Shaban Shabanin.

‘Mësuesi ynë i dashur e i respektuar, Shaban Shabani nga sot nuk do të jetë më me ditar në dorë.

Ai sot u pensionua pasi i kushtoi një jetë të tërë arsimimit dhe edukimit të shumë brezave.

Mësuesi Shaban ka nxjerrë shumë artistë që sot janë emër në botën e artit e të kulturës shqiptare.

Shaban Shabani ka shënuar shumë suksese në të gjitha trevat shqiptare. Ai mbajti gjallë kulturën tonë bash në rrethanat më të rënda nëpër të cilat kaluan shqiptarët.

Faleminderit mësuesi ynë dhe mirënjohës përjetë për krejt atë çka ke bërë për breza të tërë.

Jetë të gjatë e me shëndet tani si pensionist!’ ka shkruar Gagica. /Mediafokus.info