Përdhoset flamuri kombëtar në Konçul, reagon Arifi

Persona të panjohur për momentin kanë përdhorsur flamurin kombëtar në Konçul të Bujanocit. Ndaj këtij verpimi të turpshëm ka reaguar kryetari i Bujancit, Nagip Arifi, i cili ka thënë se askush nuk mund ta përdhos flamurin kombëtar shqiptar, duke kërkuar nga organet e rendit që të marrin masa dhe t`i zbulojnë akterët.

Njëherësh ai i ka njoftuar për këtë akt keqdashës Ambasadën Amerikane, Ambasadën Shqiptare si dhe OSBE-në, derisa nga qytetarët ka kërkuar të ruajnë gjakftohësinë dhe të mos bien pre e provokimeve.

Askush nuk mund ta përdhos flamurin kombëtar shqiptar

Veprimi i sotëm i përdhosjes së flamurit kombëtar shqiptar tek përmendorja e dëshmorit të kombit Fatmir Ibishi në Konçul është i papranueshëm dhe një provokim për destabilizim të situatës në komunën e Bujanocit.

Dënoj ashpër një akt të tillë, i cili rrezikon paqen në Bujanoc, por edhe në Luginë të Preshevës.

Pas këtij incidenti, menjëherë kam njoftuar Ambasadën e SHBA-së në Beograd, Ambasadën e Republikës së Shqipërisë në Beograd, atë të Republikës së Kosovës, si dhe Misionin e OSBE-së për rastin në fjalë.

Megjithatë, apeloj qytetarët që te ruajnë gjakftohësinë dhe mos të bien pre e këtyre provokimeve, sepse flamurin tone kombëtar askush nuk mund ta përdhosë, ndërsa ftoj organet e rendit që të marrin masa për gjetjen e akterëve të këtij akti vandal.