Presidentja Osmani dekoron me medalje presidenciale të meritave Dr. Ukshin Ismailin

Presidentja e Republikës, Vjosa Osmani-Sadriu, ka dekoruar me medalje presidenciale të meritave anesteziologun e njohur kosovar nga Gjilani, dr. Ukshin Ismaili, raporton Mediafokus.info.

Medalja i është ndarë me motivacionin “Për kontribut të jashtëzakonshëm në zhvillimin e shërbimeve të Anesteziologjisë në Kosovë dhe veprimtarinë e shquar gjatë rezistencës së luftës çlirimtare”.

Pas pranimit të kësaj medaljeje, Ismaili ka folur për Mediafokus.info, duke thënë se këtë dekoratë ia dedikon prindërve të tij, bashkëshortes, fëmijëve, rejave e nipave.

“Me nder dhe mirënjohje të thellë pranova vlerësimin nga Presidenca e Shtetit. Faleminderit Presidenres, zonjës Vjosa  Osmani-Sadriu për vlerësimin, si dhe të gjithë atyre që më kanë mbështetur gjatë rrugëtimit tim – familjes, kolegëve dhe bashkëpunëtorëve”, ka thënë ai.

Anesteziologu i njohur nga Gjilani është pensionuar në tetorin e vitit 2022, pas 40 vitesh përvojë profesionale, mentor i shumë specializatëve, drejtor i përgjithshëm e drejtor klinik për disa vite në Spitalin e Përgjithshëm të Gjilanit.

Karriera mbresëlënëse e Ismailit

Ukshin Ismaili ka diplomuar në mjekësi të përgjithshme në vitin 1981, në Universitetin e Prishtinës.

Për dy vjet e gjysmë ka punuar si doktor i përgjithshëm, për ta nisur specializimin për anesteziolog, në vitin 1984 në Zagreb, të cilin e përfundon në vitin 1988, duke u bërë anesteziologu i parë në regjion të Gjilanit dhe i pesti në nivel të Kosovës, shkruan Mediafokus.info.

Nga ky vit e deri më sot e ka ushtruar profesionin e anesteziologut dhe reanimatorit.

Pesë ditë pas bombardimeve të NATO-s, regjimi i kohës ia ndalon qasjen në Spitalin e Gjilanit, në të cilin u kthye menjëherë pas luftës.

Në vitin 2000 u emërua drejtor i Spitalit të Gjilanit, pozitë të cilën e ushtroi me sukses deri në vitin 2007.

Dr. Ukshin Ismaili është rikthyer në krye të Spitalit të Përgjithshëm të Gjilanit më 8 prill 2021, duke ushtruar pozitën e drejtorit të përgjithshëm për disa muaj.

Njihet si mjeku që i bie hise të merret me situata emergjente.

Në vitin 2002 ishte anëtar i Komitetit për menaxhimin e situatës pas tërmetit, ndërkaq më 13 mars 2020, emërohet nga Lutfi Haziri anëtar i Komitetit për menaxhimin dhe parandalimin e përhapjes së COVID-19.

Në sa operacione e kreu punën e anesteziologut?

Ai nuk ka hezituar të japë ndihmën edhe për ushtarët e UÇK-së dhe ata të UÇPMB-së, sikur që ka dhënë kontribut të jashtëzakonshëm në trajtimet e nxënësve pas helmimeve në fillim vitet e 90-ta.

Nga viti 2012 zgjidhet shef i shërbimit të Anesteziologjisë dhe Reanimacionit, në Spitalin e Përgjithshëm, derisa nga viti 2018 e deri në ditën e pensionimit e ka ushtruar pozitën e drejtorit klinik aty.

Gjatë karrierës 40-vjeçare, dr. Ukshin Ismaili e kreu punën e anesteziologut në, besoni ose jo, mbi 81 mijë operacione.

Enkas për Mediafokus.info, ai e tregon një fakt për të cilin krenohet.

“Jam shumë i lumtur që asnjë pacient ku kam marrë pjesë unë si anesteziolog, nuk ka ndërruar jetë gjatë operacionit. Bëhet fjalë për më shumë se 81 mijë operacione që i kam të regjistruara”, thotë dr. Ukshin Ismaili./Mediafokus.info/