Reagon LDK: Instaluesit e dhunës në Kuvend nuk kanë të drejtë moralizuese sot

LDK-ja ka reaguar pas përleshjeve fizike që ndodhen sot në Kuvendin e Kosovës, ndërmjet zyrtarëve të PDK-së dhe atyre të LVV-së.

Sipas LDK-së pamjet e shëmtuara të dhunës nuk e kanë vendin në Kuvendin e Republikës.

Po ashtu, LDK-ja tha se ato nuk e kanë pasur asnjëherë – as në të shkuarën – as tani, teksa shtoi se sot ishte një ditë tjetër e rëndë në historinë parlamentare të Republikës.

“Instaluesit e dhunës në Kuvendin e Kosovës nuk kanë të drejtë moralizuese sot. Ata kanë ushqyer polarizimin e skajshëm shoqëror, kanë ushqyer gjuhën e urrejtjes, ndarjes e përpalsjes në çdo sjellje e veprim të tyre; e bëjnë dhe sot”, thuhet në reagimin e LDK-së në Facebook.

“Këtë sjellje të papërgjegjshme, ndarëse e përplasëse nuk guxojmë ta ushqejmë njësoj. LDK do të vazhdojë, si gjithherë, të mbrojë dhe ushtrojë vlerat bazike demokratike e shtetare në çdo sjellje të saj, brenda sallës së Kuvendit të Republikës dhe jashta saj”.