Respektojini të vdekurit dhe familjet e tyre kur shkoni në varrime

Ka kohë që më bie në sy një shëmti e neveritshme përgjatë varrimeve. Derisa përcillet xhenazja e gjatë kohës kur kryhen obligimet fetare, njerëz të tërë ia krisin muhabetit si të ishin në kafehane.

Disa shihen duke u zgërdhyer e duke qeshur me zë. Shkojnë në varrim kinse për respekt, por ata nuk respektojnë as të vdekurin e as familjarët e të vdekurit.

Me këto sjellje po tregojnë paedukatën e tyre të skajshme.

Hajde që nuk hyjnë në safe për t’ia falë xhenazen, hajde nëse janë të panjerëzishëm në jetën e tyre, por së paku të tregojnë kulturë duke e respektuar të vdekurin.

Ka pas raste kur u kam reaguar të tillëve me ndonjë shikim poshtërues. Duke dashur tu them se janë të paditur e të paedukatë.

Shfrytëzoj nga rasti t’i bëjë thirrje hoxhallarëve tua tërheqin vërejtjen këtyre njerëzve.

Nuk gabojnë fare nëse edhe me mikrofon në dorë u thonë të heshtin.

Bile, e konsideroj për obligim të hoxhallarëve ta bëjnë një gjë të tillë.

Dikush duhet t’i mësoj këta njerëz e tu tregoj se koha e varrimit nuk është kohë muhabeti.

Por është kohë lutje tek Allahu për mëshirë ndaj të vdekurve e për respekt ndaj tyre dhe familjarëve të tyre.

Kjo që po ndodh tek shqiptarët vështirë ta gjesh tek ndonjë popull tjetër.

O ju njerëz! Tregohuni respektues së paku në këto raste të ndjeshme. Leni muhabetet nëpër varrime.

Përndryshe, pse të jeni pjesëmarrës aty. Në vend të sevapit e respektit, ju po hyni n’xhynah e po tregoni paedukatën tuaj. Po tregoni mosrespekt ndaj të pranishmëve. E hiç e më hiç ndaj të vdekurve dhe familjarëve të tyre….!

Hoxhë Mustafë Bajrami