Shënohet viktima e parë me Covid në Kamenicë

Kryetari i Komunës së Kamenicës, Qëndron Kastrati ka njoftuar se ka vdekur një 64-vjeçar nga ky qytet, i infektuar me koronavirus

Përmes një postimi në llogarinë e tij në Facebook, Kastrati ka bërë me dije se kjo është vdekja e parë nga COVID-19 në komunën e Kamenicës.

“Sapo jemi njoftuar se në Klinikën Infektive në Prishtinë, ka ndërruar jetë një qytetar i yni 64 vjeç, i identifikuar me #COVID 19. I ndjeri është nga komuniteti serb dhe u shpreh ngushëllimet më të sinqerta familjes e miqve”, ka shkruar Kastrati.

Ai u ka bërë thirrje qytetarëve që të mbajnë maska, distancën dhe të dezinfektojnë duart vazhdimisht.

“Ju lutem bartni maskat, mbani distancën dhe dezinfektoni duart vazhdimisht. Me këto tre hapa të thjeshtë siguroni veten dhe tjerët rreth jush. Edhe njëherë, ngushëllimet më të sinqerta familjes!”, ka shkruar Kastrati, i cili edhe vetë ka qenë i prekur nga ky virus dhe ka respektuar masën e vetë izolimit shtëpiak. /mediafokus.info