Shqiptarët e Tuzit votojnë sot për kryetarin e Komunës

Në komunën me shumicë shqiptare të Tuzit (Mal i Zi) këtë të dielë mbahen zgjedhjet vendore, ku garojnë katër koalicione dhe tri parti politike.

Alternativa Shqiptare e kryetarit aktual, Nik Gjeloshaj, është bashkuar me Lidhjen Demokratike të Shqiptarëve, Unionin Kombëtar Shqiptar dhe Lidhjen Demokratike, nën emrin “Forumi Shqiptar”.

Në krahun tjetër është koalicioni nga Partia Demokratike Socialiste, e presidentit aktual Milo Gjukanoviq, Socialdemokratët, Partia Boshnjake dhe Unioni Demokratik i Shqiptarëve, shkruan Zëri i Amerikës.

Zgjedhjet e së dielës janë të dytat që nga ndarja e kësaj bashkësie lokale nga komuna e Podgoricës në vitin 2018.

Të dielën për këto zgjedhje do të hapen 30 vendvotime, ku të drejtë vote do të kenë mbi 12,000 votues.