Vasfije Krasniqi: Përse, Korça ime!?

Edhe deputetja e Lëvizjes Vetëvendosje, Vasfije Krasniqi, ka reaguar ndaj ftesës së organizatorit për këngëtarin serb Goran Bregoviq, që ai të marrë pjesë në Festën e Birrës në Korçë.

Në një shkrim në Facebook, Krasniqi ka shkruar: “Dhimbja jonë shkon përtej asaj që ne e vlerësojmë kombëtare- nacionale primitive apo civilizuese, tek e fundit, dhembja nuk i njeh këto emërtime, ajo shkaktohet nga dikush mbi dikend, së paku me qëllimin e shfryrjes së epsheve shtazarake e barbare, e pastaj të tjera me radhë”.

Krasniqi tutje ka shkruar se derisa në Kosovë forcat serbe po kryenin pastrim etnik, Goran Bregoviq po bënte thirrje që të ndaleshin sulmet e NATO-s.

“Korça ime, derisa në Kosovë forcat serbe po kryenin spastrim etnik, duke e përcjellë forma të ndryshme të kryerjes së krimeve, ishte pikërisht Goran Bregoviq, i cili nuk bënte thirrje që të ndalej gjenocidi, por që të ndaleshin sulemt e NATO-s, e pastaj ata (serbët) të mos ndalonin ndoshta deri tek Korça juaj-ime, sepse, kështu kishte ndodhur në të kaluaren, por që ne nuk e kemi harruar, jo pse unë-ne e përjetuam tani, por ata u kujdesen që ne të mos e harronim kurrë”.

“Korça ime, çdo gjë ndoshta edhe mund të kompenzohet, thuhet se edhe jeta rilind bashk me kohën, por NDERI që humbet kurrë nuk të kthehet, nder me të tillët nuk ka. Bota demokratike nuk pranon njerëz me bindje të tilla, së paku ju mos e bëni nga dëshira, sepse, mjaft jemi duke bërë ne për paqen”, ka thënë Vasfije Krasniqi, viktimë e dhunimit nga forcat serbe, gjatë luftës në Kosovë.