Gjilani në kohën e zanatlinjve dhe esnafëve – një qytet që jetonte ndryshe

Shkruan: Ismajl Veliu

Kjo foto paraqet një kohë kur qyteti kishte shumë zanatlinj e esnafë të ndryshëm, të cilët me punën dhe mjeshtërinë e tyre i jepnin gjallëri, identitet dhe frymë qytetit.

Në këto lokale të vogla, që sot shumica nuk ekzistojnë më, punohej me dekada të tëra nga njerëz të ndershëm e punëtorë, të cilët ishin pjesë e pandashme e jetës së përditshme.

Në këtë pamje shihen objektet e vjetra karakteristike të kohës, rrugët e qeta dhe atmosfera e një qyteti që jetonte ndryshe.

Afër shihet edhe Xhamia Shehzade me minaren e saj të lartë, një nga simbolet më të njohura të qytetit, që për dekada ka qenë pjesë e jetës shpirtërore dhe historisë së Gjilanit.

Dikur qyteti kishte më shumë gjelbërim, oborre me pemë, kopshte e rrugë ku freskia dhe hijet e drunjve i jepnin një pamje të veçantë.

Njerëzit njiheshin mes vete, dyert e dyqaneve ishin gjithmonë të hapura dhe esnafët ishin zemra e qytetit.

Në këto lokale punohej nga terzinjtë, berberët, opingarët, farkëtarët e shumë mjeshtër të tjerë që me zanatin e tyre mbanin gjallë ekonominë dhe traditën qytetare.

Çdo rrugë kishte historinë e vet, ndërsa çdo lokal ishte një pikë takimi ku zhvilloheshin biseda, miqësi dhe jeta sociale e qytetit.

Fotografitë e tilla sot kanë vlerë të madhe historike, sepse na rikthejnë kujtimet e një kohe më të qetë, me më shumë gjelbërim, më shumë afërsi mes njerëzve dhe me një frymë qytetare që ende kujtohet me nostalgji.