Abdixhiku kujton Sali Çekajt: Aktivitetin e nisi përmes LDK’së e Rugovës, iu bashkua UÇK-së për t’u bërë i pavdekshëm
Në 22 vjetorin e rënies së heroit Sali Çekajt , kryetari i LDK’së, Lumir Abdixhiku, ka thënë se veprën e tij e ruajmë si trashëgimi politike e atdhetare për lirinë e Kosovës, transmeton Mediafokus.info.
Njoftimi i plotë i LDK’së
“Sot, kujtojmë Sali Çekaj, Heroin e Kosovës, në njëzet e dy vjetorin e rënies së tij në Betejën e Koshares, veprën e të cilit e ruajmë si trashëgimi politike e atdhetare për lirinë dhe shtetndërtimin e Kosovës.
Rezistencën e tij politike e nisi përmes aktivitetit në Lidhjen Demokratike të Kosovës, krah Presidentit Historik dr. Ibrahim Rugova. Në kohën kur i nevojitej më së shumti vendit tonë, ai me pushkë në dorë iu bashkua radhëve të UÇK-së në Koshare dhe kështu, u shndërrua në Heroin e pavdekshëm të Kosovës.
Sali Çekaj intelektual i rrallë, jurist me profesion, dhe ushtarak i kalibrit të lartë, ishte detyruar nga regjimi okupues serb që të largohej nga Kosova, por aktivitetin e tij nuk e ndali asnjëherë. Si nënkryetar i Degës së LDK-së në Gjermani, u bë organizator i shkëlqyeshëm i shqiptarëve për të ndihmuar materialisht e politikisht çlirimin e Kosovës.
Sali Çekaj me punën dhe përkushtimin e tij, prej politikani e ushtaraku vizionar, do mbetet përherë në piedestalin e historisë tonë.
Lavdi e përjetshme jetës dhe veprës së Heroit të Kosovës Sali Çekaj!”.
