Alban Ramosaj e fiton Këngën Magjike me ‘Thikat e mia’
Alban Ramosaj me këngën “Thikat e mia” është fitues i edicionit të 22-të të Festivalit Kënga Magjike. Këngëtari u shfaq i përlotur pasi u shpall fitues, ndërsa u shpreh se nuk mund ta besonte që ky moment ishte bërë tanimë realitet.
“E kam mendua këtë moment dhe nuk po më besohet akoma, nuk kam fjalë. Faleminderit nga shpirti, nga zemra, më rikujtuat arsyen përse bëj këtë që bëj. Ju falenderoj nga shpirti edhe njëherë. Ndihem më i vlerësuar se kurrë, jam pa fjalë”.
‘Dua të falenderoj bashkëpunëtorët, Fifi, Bruno, Flori, çunat të gjithë… të gjithëve që më votuan, por dikë dua të falënderoj më shumë, është ajo që e thashë pak më herët: Mamin, për gjithçka ke bërë për mua’, tha Ramosaj.
Ndërkaq, Çmimi Best New Artist këtë vit shkoi për grupin Urban Band. Çmimi Best International Artist e mori artistja nga Gjeorgjia, Nutsa.
Sistemi i votimit në Kënga Magjike ishte i ndarë në tre pjesë. Artistët votuan për njëri-tjetrin, po ashtu edhe publiku votoi për të preferuarin e tij dhe vota e jurisë e përbërë nga Enkel Demi, Jonida Maliqi, Markelian Kapidani, Arben Skënderi dhe Kozeta Kurti.
