Arrestohen 5 persona në Viti, dyshohen për “keqpërdorim të pozitës apo autoritetit zyrtar”
Policia e Kosovës ka arrestuar në Viti 5 persona të dyshuar për ‘keqpërdorim të pozitës apo autoritetit zyrtar’ dhe pas intervistimit, dy prej tyre janë ndaluar në mbajtje, ndërsa tre të tjerë janë liruar në procedurë të rregullt.
Njoftimi i plotë i policisë:
Policia e Kosovës, Drejtoria për Hetimin e Krimeve Ekonomike dhe Korrupsionit, gjegjësisht Njësiti Rajonal për Hetimin e Krimeve Ekonomike dhe Korrupsionit në Gjilan, pas një hetimi disa mujor, në bashkëpunim me Prokurorinë Themelore në Gjilan, kanë arritur të sigurojnë dëshmi relevante se personat e dyshuar me iniciale F.A, F.R, R.Sh, Sh.K, S.S, kanë kryer veprën penale “Keqpërdorim i pozitës apo autoritetit zyrtar”.
Të dyshuarit gjatë implementimit të kontratës (dt.18.07.2019) ‘Asfaltimi rrugëve rurale në komunën e Vitisë’, për LOT I dhe LOT, i dyshuari i parë (F.A.), ka nënshkruar urdhër blerjen në cilësinë e menaxherit të prokurimit, ai ka nënshkruar urdhër blerjet për hedhjen e zhavorrit në dy rrugë në fshatin Pozheran në vlerë prej 9,747€ (nëntë mijë e shtatëqind e dyzet e shtatë euro), të cilat ishin asfaltuar në vitin 2019.
Tre të dyshuarit (komision) me iniciale (R.Sh.-kryetar, SH.K.–anëtar dhe S.S.-anëtar, për pranim teknik kanë futur në procesverbal të pranimit teknik, si person prezent “një menaxher të një punishteje”, pa qenë fare prezent dhe pa pasur njohuri për këtë tender.
Sipas dokumentacionit shihen se dy rrugë janë asfaltuar–kryer, paguar në vitin 2019, sipas dokumentacionit zhavorri është hedhur në vitin 2020 në vlerë prej 6,870€+2877€=9,747€ (mbi rrugën e asfaltuar) dhe komisioni e ka pranuar këto rrugë të asfaltuara pa i vërejtur pozicionet e zhavorrit. Bazuar në analizë këto situacione janë fiktive.
Sot me datën 05.07.2021 të dyshuarit e lartshënuar janë arrestuar dhe janë intervistuar nga Policia e Kosovës në Gjilan, në prezencën e avokatëve sipas detyrës zyrtare.
Pas përfundimit të intervistave, është njoftuar prokurori i lëndës dhe me urdhër të tij, të dyshuarit me iniciale (F.A. dhe F.R.) ndalohen në qendrën e ndalimit për 48 orë, ndërsa të dyshuarit me iniciale (R.Sh., Sh.K., dhe S.S.) janë liruar në procedurë të rregullt.
Lidhur me rastin hetime aktive ende janë në proces, thuhet në njoftimin e policisë.
