Doktori Ukmata jep shpresa: Pas dy jave mund të shohim rënie të të infektuarve me Covid-19
Doktori kosovar, Driton Ukmata ka parashikuar se pas dy javësh mund të ketë zvogëlim të rasteve me Covid-19 në Kosovë.
“Nëse popullata vetëdijesohet për masa mbrojtëse dhe distancim fizik, pas 2-3 javëve të vështira, mund të shohim rënie të numrit të infektuarve me Covid 19”, ka shkruar Ukmata në Facebook.
Statusi i plotë:
A jemi afër peak-ut?
Nëse popullata vetëdijësohet për masa mbrojtëse dhe distancim fizik, pas 2-3 javëve të vështira, mund të shohim rënie të numrit të infektuarve me Covid 19. Fillimi i muajit gusht mund të na pret me nën 50 raste në ditë dhe shumë pak fatalitete, por me numër ende të lartë të pacientëve që kërkojnë kujdes spitalor.
Me datë 1 korrik, atëhere kur ishin vetëm 50 raste në ditë, kam bërë këtë parashikim për muajin korrik 2020 për nevojat e SHSKUK:
– Në javët në vijim, Kosova do të ketë mesatarisht 200+ raste të konfirmuara me Covid 19 në ditë;
– Mestarisht, 12.5 % e të sëmurëve të konfirmuar me Covid 19 do të kenë nevojë për hospitalizim;
– Mesatarja e vdekjeve në ditë do të jetë 5 pacientë, kurse numri i vdekjeve mund të mbërrijë edhe 10 në ditë;
– Një cikël i sëmundjes zgjatë mesatarisht 21 ditë;
– Shërbimi spitalor duhet të ketë afërsisht 500 shtretër në dispozicion për pacientët e konfirmuar dhe të dyshuar me Covid 19.
Numri i qytetarëve aktualisht të infektuar me Covid 19 ne Kosovë është më i madh, numri i testimeve ditore është i vogël (5 herë më i vogël se i Maqedonisë Veriore).
Në nivel global, shohim rënie të numrit të fatalitetit të pacientëve të konfirmuar me Covid-19 dhe rritje të numrit të infektuarve.
Tashmë mund të jemi në fazën 2 të epidemisë. Dyshohet se rastet me Covid 19 në Kosovë datojnë që nga fund viti 2019.
Shënim:Fatkeqësisht, për shkak të mungesës së konsistencës dhe saktësisë në mbledhje dhe analizim të të dhënave në Kosovë, për momentin është e pamundur të bëhet një studim më i saktë për trendin e përhapjes së Covid 19 dhe për ketë arsye duhet te bazohemi në të dhëna nga vendet tjera.
#rrinshpi, mbaj distancën dhe maskën!