Gjenden mbetje kockore të së paku 23 personave gjatë gërmimeve në Zubin Potok

Mbetje kockore që dyshohet se u përkasin së paku 23 individëve janë gjetur gjatë gërmimeve dhe ekshumimeve (nxjerrjes së trupaave ose mbetjeve mortore nga varri) në një lokacion në Zubin Potok.

“Gjatë këtyre veprimeve, bazuar në vlerësimin preliminar, ekipet e Insitutit të Mjekësisë Ligjore kanë gjetur mbetje kockore, të cilat dyshohet se u përkasin së paku 23 individëve”, thuhet në njoftim.

Megjithatë, identifikimi i plotë i tyre do të bëhet pas përfundimit të ekzaminimeve mjeko-ligjore dhe procedurave të tjera përkatëse.

Në kuadër të këtij rasti, Prokuroria Speciale dhe Policia e Kosovës, përmes Drejtorisë për Hetimin e Krimeve të Luftës dhe në koordinim me institucionet e tjera kompetente, do të vazhdojnë hetimet dhe veprimet procedurale.

Aktualisht, për këtë rast janë duke u hetuar tre persona, me inicialet J.R., M.J. dhe M.B., nën dyshimin për kryerjen e veprës penale “Krime lufte kundër popullsisë civile”. Të tre ndodhen në paraburgim.

Prokuroria Speciale, Policia e Kosovës dhe Instituti i Mjekësisë Ligjore kanë deklaruar se janë të përkushtuara që procesi të zhvillohet në mënyrë profesionale, të paanshme dhe të dokumentuar, duke respektuar dinjitetin e viktimave dhe familjeve të personave të zhdukur.

Institucionet kanë bërë të ditur se çdo zhvillim i ri lidhur me rastin do të bëhet publik në përputhje me kërkesat ligjore dhe interesat e hetimit.