Jakup Krasniqi i reagon prokurorit Smith: Mos fol në emër të popullit të Kosovës

Jakup Krasniqi është përplasur verbalisht në seancën e sotme paragjyqësore me prokurorin e Speciales, Jack Smith, duke kërkuar prej tij të mos flas në emër të popullit të Kosovës.

“Kam një reagim në fjalën e prokurorit Smith kur foli në emër të Popullit të Kosovës. Në emër të qytetarëve të Kosovës mund të flasim ne përfaqësuesit e tij. Unë 45 vjet të jetës sime jam angazhuar për lirinë dhe për çlirimin e kombit tim nga robëria. Në zgjedhjet e vitit 1992 kam qenë i zgjedhur deputet në Kuvendin e Kosovës që regjimi kriminal  i Serbsië nuk e ka lejuar të konstituohet. Pas çlirimit kam qenë përfaqësues në Kuvend deri në vitin 2014”, ka thënë Krasniqi.

Ai tutje është shprehur që nëse Prokurori Smith dëshiron të flet në emër të krimeve të pretenduara le të bëhet mbrojtës i krimeve të Serbisë ndaj Kosovës.

“E kisha lutur prokurorin që nëse ai  duhet të flet në emër të dikujt ose nëse duhet të flet emër të krimeve të pretenduara ai le të bëhet mbrojtës i politikave të krimit dhe gjenocidit që ka përdorur Serbia që nga vitit 1876-1878 ndaj popullit të Kosovës. Në emër të popullit tim dhe në emër të luftës dhe sakrificave flasim ne përfaqësuesit e tij dhe jo ata që tentojnë ta dënojnë luftën shumë vjeçare të kombit tim dhe në mënyrë të veçantë luftën e fundit të popullit për liri barazi e shtetndërtim, për çka ne e kemi fituar mbështetjen ndërkombëtare dhe e kemi çliruar Kosovën”, ka thënë Krasniqi.