Kosovës po i ‘teprojnë’ vaksinat!

Kosova mbetet vendi me më së paku të vaksinuar në rajon, meqë nuk ka arritur të sigurojë sasinë e duhur të vaksinave për imunizimin e popullatës. Megjithatë, nuk ka arritur t`i shfrytëzojë sipas planit as ato pak vaksina që i ka siguruar.

54 mijë persona ishin paraparë të imunizohen në fazën e parë të vaksinimit, përshirë këtu fillimisht 15 mijë mantelbardhë, duke u pasuar me qytetarët e moshës mbi 80 vjeç dhe një pjesë e atyre që vuajnë nga sëmundjet kronike.

Megjithatë, 24 mijë dozat e vaksinës AstraZeneca nuk arritën të shpenzohen as për gjysmën e personave të planifikuar për imunizim në fazën e parë, transmeton EO.

Madje, për ta shpenzuar këtë kurë, Ministria e Shëndetësisë ka njoftuar se që nga e premtja do të nisë vaksinimi edhe për qytetarët e moshës 75-79, grupmoshë kjo që është paraparë të imunizohet në fazën e dytë.

E sipas ekspertes për Politika Shëndetësore, Hana Xhemajli, kjo po ndodh për shkak që mantelbardhët refuzuan vaksinimin dhe si pasojë e kësaj plani për vaksinim u adaptua në kësi forme.

Të njëjtën e pohon edhe kreu i Shoqatës së Pacientëve, Besim Kodra, derisa ky i fundit druan se imunizimi i popullsisë prej 70 % brenda këtij viti është vështirë i arritshëm me këtë ritëm të vaksinimit, përcjell Klan Kosova.

Megjithëkëtë, të dy këta thonë se e gjitha kjo do të shmangej nëse me kohë do të punohej në avokim dhe fushata vetëdijesuese.