Kurteshi sërish nervoz: “Hajt more mos më lodhni”

Sami Kurteshi, përfaqësuesi i Lëvizjes Vetëvendosje në KQZ-së, ka vazhduar me përplasjet e tij në takimet e komisonit, edhe pas largimit të Valdete Dakës, me të cilën kishte shumë mospajtime, por duket se nuk paskan qenë personale, siç pretendohej.

Kurteshi kësaj radhe ka diskutuar me kreun e ri të KQZ-së, Kreshnik Radoniqi. Ai insistonte se po diskuton lidhur me pikën e katërt të rendit të ditës, teksa kërkonte që të mos i ndërhynin.

“Sa për informimin tuaj të saktë asnjë mbledhje nuk e ka thirrë zonja Daka të Këshillit për marrëdhënie me jashtë sepse ka pasë arsyetime, pandemia e anej, ka qenë e zënë nuk e di çka. Unë jam duke folur zotri kryesues për pikën e katërt të rendit të ditës dhe asnjë fjalë personale nuk e thashë për livadhin e babës tim, unë po them çka është çështja. Ju lutem mos ndërhyni se unë nuk po ndërhyjë. Kur të ndërhyjë për një çështje personale, veç thuani lëshoje mbledhjen se s’kemi ardhë me i zgjidh çështjet e tua personale”, ka thënë Kurteshi.

Pas kësaj deklarate ai është parë i nervozuar duke dalë nga mbledhja.

“Krimi i organizuar ka humbë më 14 shkurt, këtu po dojnë me e mbajtë. Hajt bre allahile, mos më lodhni”, ka thënë Kurteshi duke lëshuar mbledhjen.