Kurti: Derisa vaksina nuk ekziston, kjo është e vetmja mënyrë për t`u mbrojtur nga virusi

Në një konferencë për media, kreu i Qeverisë, Albin Kurti e ka arsyetuar veprimin e ushtruesit të detyrës së punëve të Brendshme, Xhelal Sveclës sa i përket lejeve për deputetë për të marrë pjesë në seancën e sotme, ku është paraparë të diskutohet propozimi i PDK-së për një pako fiskale.

Kurti tha para mediave se me këtë veprim janë duke u trajtuar njëjtë qytetarët dhe deputetët.

“Besoj që është më miri të përgjigjet vetë ushtruesi i detyrës të ministrit, por është e qartë që Prishtina është në karantinë, në mënyrë që të mos ketë kurrfarë pengese për deputetët besoj që e ka marrë një vendim të tillë. Unë e kam bindjen time që seancat e tilla jo vetëm që nuk janë të dobishme por janë kundër produktive, dërgojnë mesazh negativ te qytetarët. Janë të kota, për brengën e ngritur nuk mund të kenë ndikimin që dua. Po trajtohet edhe deputeti si qytetari s’besoj që duhet të ketë qytetarë që ankohen”, thotë ai.

Njëjtë është deklaruar edhe ministri në detyrë i Financave, Besnik Bislimi. Ai thotë se është hipokrizi që të atakohet ushtruesi i detyrës së ministrit.

“Ditën e diel në ditën kur është vendosë Prishtina në karantinë, jam ndalë nga policia dhe më është dashtë të argumentoj që jetoj në Prishtinë që të më lejojnë me hy, që do të thotë se të gjithë do të kontrollohen pa marrë parasysh pozitës. Është hipokrizi që të atakohet ushtruesi i detyrës së ministrit”, ka deklaruar Bislimi.

Në këtë konferencë, Kurti është përgjigjur në shumë pyetje të gazetarëve, duke mos u pajtuar që vendimi për kufizimin e rreptë të lëvizjes mund të jetë kundërkushtetues.

“Derisa vaksina nuk ekziston, kjo është e vetmja mënyrë për t`u mbrojtur nga një armik i rrezikshëm dhe i panjohur për trupin tonë”, ka thënë Kurti./mediafokus.info