Lajmi i fundit: Arrestohet shoferi i veturës që goditi rëndë këmbësoren

Njësiti i hetimeve të Trafikut Rajonal të Prishtinës ka identifikuar sot personin dhe automjetin që ka qenë i përfshirë në aksidentin e djeshëm në rrugën Prishtinë-Fushë Kosovë, ku është lënduar rëndë një këmbësore.

Policia njofton se fillimisht nga hetuesit është përcjelljë automjeti i dyshuar, derisa ka arritë në një autoservis në Çagllavicë. Më pas i dyshuari është arrestuar.

“Ka qenë reagimi i shpejtë i hetuesve ai që ka mundësuar arrestimin e personit të dyshuar si dhe konfiskimin e automjetit të tipit Opel Corsa i cili ishte i dëmtuar”, tha policia.

“Pas përfundimit të procedurave të nevojshme policore, rasti do të përcillet në koordinim me prokurorin e shtetit”, thuhet tutje në njoftimin e policisë.

Kujtojmë se dje rreth orës 11:00, në rrugën Prishtinë – Fushë Kosovë, ka ndodhur një aksident trafiku ku është përfshirë një automjet në lëvizje dhe një këmbësore.

Si pasoj e aksidentit lëndime të rënda trupore ka pësuar këmbësorja 20-vjeçe e cila është dërguar për tretman mjekësor.